Stefán Boulter opnar sýninguna Birtingarmyndir í Hannesarholti  laugardaginn 29.ágúst kl.15-16.30. Verkin á sýningunni eru allt  olíumálverk á striga.

Stefán hefur kosið að kalla það sem hann gerir “ljóðrænt raunsæi.”  Hann býr til táknmyndir sem eru frásagnarlegs eðlis, bæði persónulegar  og byggðar á þekktum og fornum grunni. Hugleiðingar um náttúruna,  tilvist okkar í henni og dýrkun hennar skipar þar stóran sess, með  áherslu á dýrin og viðveru hluta og áru þeirra. Hann hefur einnig verið  talsmaður nýrra og breyttra heimspekilegra viðhorfa í listsköpun og bera  verk hans þess merki. Stefán hefur sýnt verk sín í söfnum og galleríum  bæði hér heima og erlendis.

FARVEGUR nefnist vatnslitasýning Ólafar Svövu Guðmundsdóttur sem  opnar laugardaginn 8.ágúst kl.15-17. Myndirnar eru málaðar á síðustu  tveimur árum. Sýningin er sölusýning og stendur til miðvikudagsins 26.  ágúst.

Ólöf er fædd og uppalin í Reykjavík. Hún er útskrifaður leikskóla-og  listgreinakennari. Skapandi starf og þróunarverkefni í leikskólum hefur  átt hug hennar síðastliðin þrjátíu og fimm ár. Einnig kenndi Ólöf  vatnslitamálum í Myndlistarskóla Kópavogs síðastliðið ár.

Ólöf segir vatnsliti hafa heillað sig alla tíð: ,,Þeir eru uppspretta  hugmynda og ævintýra. Gegnsæi og eiginleiki vatnslitanna hvetja til  sköpunar. Sköpunin finnur sér alltaf farveg. Farvegurinn er náttúran,  birtan og sköpunin. Við erum ekkert án náttúrunnar. Hún er lífið  sjálft.“

Hljómsveitin BREK heldur tónleika í Hannesarholti miðvikudagskvöldið 24.maí kl.20:30.

Brek gaf út sín fyrstu lög í febrúar 2020 og hefur ekki slegið slöku við síðan.

Akústísk tónlist sveitarinnar sækir áhrif víða að m.a. úr íslenskum  þjóðlagaarfi, skandinavískri og bandarískri tónlist, jazzi og fleiru.  Áhersla er lögð á vandaða íslenska texta en jafnframt að skapa stemningu  sem er grípandi og þægileg en þó krefjandi á köflum.

Í tilefni af útkomu stuttskífu þann 19. júní sem inniheldur fjögur ný  lög ætlar hljómsveitin að fagna því með fallegum tónleikum í  Hannesarholti miðvikudaginn 24. júní kl. 20:30.

Helga Laufey Finnbogadóttir og Haukur Gröndal hafa leikið saman við  ýmis tækifæri síðustu 15 ár. Hér koma þau fram með nýtt dúó sem flytur  söngva frá Miðjarðarhafslöndunum, Argentínu og Brasilíu. Bæði eru þau  þekkt fyrir að leika hina ýmsu tónlistarstíla og á þessum tónleikum  verða flutt lög og verk sem endurspegla þann bakgrunn. Helga Laufey  leikur á flygilinn og Haukur á altósaxófón og klarinett.

Verk eftir Piazzolla verða fyrirferðarmikil en einnig söngvar eftir  spænska tónhöfunda sem og lög frá Brasilíu í í svokölluðum Choro stíl.

Fjölbreyttir tónleikar þar sem svífandi melankólískar laglínur vefa  sig saman við mansöngva, sitrandi af ástríðu sem leiðir okkur taktfast  inn í vorið.

Helga Laufey Finnbogadóttir lauk burtfararprófi á píanó frá  Tónlistarskólanum í Reykjavík og stundaði síðan framhaldsnám við  Sweelinck tónlistarháskólann í Amsterdam , fyrst í klassískri tónlist en  söðlaði yfir í jazzdeild skólans og útskrifaðist þaðan 1994.

Hún hefur starfað við marga tónlistarskóla sem meðleikari , m.a. við  Söngskólann í Reykjavík, söngdeild Tónlistarskóla FÍH, Domus Vox,  Tónskóla Sigursveins og söngleikja- og unglingadeild Söngsskóla Sigurðar  Demetz auk þess að kenna á píanó við Tónlistarskólann á Seltjarnarnesi.  Hún hefur tekið þátt í tónleikahaldi innanlands og utan , meðal annars í  Norræna húsinu, á Gljúfrasteini , í Salnum og á Gljúfrasteini.

Haukur hóf að leika á klarínett og saxófóna á unga aldri. Hann var  búsettur í Danmörku í tæp 10 ár þar sem hann var við nám og ýmis störf.  Haukur hefur leikið á tónleikum og tónlistarhátíðum um stóran hluta  Evrópu, í Bandaríkjunum og á Indlandi. Hann hefur leikið með  Sinfóníuhljómsveit Íslands, Stórsveit Reykjavíkur og leikið í uppfærslum  á söngleikjum í Borgarleikhúsinu og Þjóðleikhúsinu. Haukur hefur verið  ötull tónsmiður og útsetjari og verk hans hafa verið flutt af ýmsum  hljómsveitum heima og erlendis.Árið 2018 hlaut hann íslensku  tónlistarverðlaunin fyrir verkið “Pétur… en hvað varð um úlfinn?” í  flutningi Stórsveitar Reykjavíkur. Haukur hefur haldið úti eigin útgáfu;  Rodent Records sem hefur gefið út 12 titla frá árinu 2003.

Uppselt  var á útgáfutónleika Guðmundar Andra Thorssonar og félaga laugardaginn  6.júní síðastliðinn og þess vegna verða þeir endurteknir laugardaginn  20.júní kl.16, til að gefa þeim tækifæri sem ekki komust að síðast.

Ótrygg er ögurstundin nefnist hin nýútkomni diskur með frumsömdum  lögum og textum – og flytja þeir félagar lög af þessum diski, sem helst  má lýsa sem lágværri, hlýrri og angurværri vísnatónlist.

Guðmundur Andri og félagar - Ótrygg er ögurstundin

Hátíðardagskrá á þjóðhátíðardegi þar sem fléttað er saman  einsöngslögum og dúettum fyrir sópran og mezzósópran við píanóundirleik.
 Tónlistarkonurnar flytja ástkær íslensk sönglög sem mörg hver skipa sérstakan sess hjá þjóðinni.

Ingibjörg Guðjónsdóttir sópran stundaði söngnám við  Tónlistarskóla Garðabæjar en framhaldsnám við Indiana University í  Bandaríkjunum. Ingibjörg hefur haldið fjölda einsöngstónleika, tekið  þátt í tónlistarhátíðum, óperum og verið einsöngvari með  sinfóníuhljómsveitum, kammersveitum og kórum, bæði hér á landi og  erlendis. Hún hefur gefið út tvær geislaplötur, Óperuaríur og Ó Ó  Ingibjörg. Ingibjörg er söngkennari við Tónlistarskóla Hafnarfjarðar og  stjórnandi Kvennakórs Garðabæjar.

Nathalía Druzin Halldórsdóttir mezzósópran lauk  8.stigs prófi frá Nýja Tónlistarskólanum. Fyrstu söngtímana tók hún í  St. Pétursborg í Rússlandi, og stundaði einnig söngnám við Söngskólann í  Reykjavík og í Tónskóla Sigursveins. Hún hefur komið fram á fjölmörgum  einsöngstónleikum bæði hérlendis og erlendis og sungið með  Sinfóníuhljómsveit Íslands, hjá Íslensku óperunni og með ýmsum kórum.

Ástríður Alda Sigurðardóttir píanóleikari hóf  nám í píanóleik 6 ára gömul hjá móður sinni, Guðrúnu Guðmundsdóttur en  útskrifaðist frá Tónlistarskóla Reykjavíkur og stundaði framhaldnám við  Indiana University. Ástríður hefur komið víða fram á tónleikum, ýmist  sem einleikari eða með öðrum tónlistrmönnum. Hún er meðlimur í Elektra  Ensamble og tangósveitinni Fimm í tangó. Árið 2012 gaf hún út  sólóplötuna CHOPIN en einnig hefur komið út geisladiskurinn ALDARBLIK  með henni og söngvurunum Eyjólfi Eyjólfssyni og Ágústi Ólafssyni.  Ástríður Alda kennir við Tónlistarskóla Hafnarfjarðar.

Gítarleikarinn  Reynir del Norte heldur Flamenco tónleika í Hannesarholti laugardaginn  4.júlí kl.20. Tónleikarnir eru hluti af tónleikaseríu sem Reynir heldur  hringinn í kringum landið dagana 2.-17. júlí.

Reynir er fæddur og uppalinn á Hvanneyri en hefur búið um árabil í  Granada, Spáni þar sem hann vinnur sem Flamenco listamaður. Hann hefur  sett upp ótal tónleika hér á Íslandi og á Spáni með Flamenco  hljómsveitum eða sem einleikari. Reynir er þekktur fyrir orkumikinn og  tilfinningaríkan flutning í bland við skemmtilegar sögur og spjall á  mili laga um líf hans í Andalúsíu.
 Reynir del Norte gaf út sína fyrstu sólóplötu, El Reino de Granada, í  desember 2019 sem jafnframt er fyrsta íslenska Flamenco hljómplatan.  Platan inniheldur 8 tónsmíðar Reynis sem fluttar voru af honum sjálfum í  samstarfi við nokkra af færustu Flamenco listamönnum Granada.
 Lög plötunnar verða flutt á tónleikunum sem og nokkur þekkt íslensk  dægur-og þjóðlög útsett af Reyni fyrir Flamenco gítar. Þema tónleika  verður því Íslenskt Flamenco.
 ——-
 The icelandic guitarist Reynir del Norte will be touring Iceland from  2nd – 17th of july as a solo Flamenco guitarist. This concert in  Hannesarholt, Saturday July 4th at 8 pm, is a part of that series of  concerts.
 Reynir is born and raised in a town called Hvanneyri in the west part of  Iceland but he has lived in Granada Spain for the past years where he  works as a Flamenco player. He has been introducing the beauty and magic  of Flamenco to Icelanders in the past years with his spanish Flamenco  group as well as a soloist. Reynir is known for lively and energetic  performances with vivid stories in between songs from his journey  through Andalucía.
 Reynir del norte released his first solo album called El Reino de  Granada in december 2019, which is also the first Icelandic Flamenco  record. The album features 8 original compositions performed by himself  with help from some of the finest Flamenco artists in Granada. He will  perform the songs from the album on the concerts along with Icelanic  songs and folk tunes arranged by himself for Flamenco guitar. The theme  of the concert will be Icelandic Flamenco.

Reynir Del Norte - Flamenco hringinn í kringum landið

Spútnikk Strengjakvartett heldur hádegistónleika í Hannesarholti á Sjómannasunnudaginn 7. júní kl.12.15.

Á efnisskránni eru Strengjakvartett opus 54 no.1 eftir Joseph Haydn.

Strengjakvartettinn Spúttnik var stofnaður árið 2018. Meðlimir í  Spúttnik eru fiðluleikararnir Sigríður Bjarney Baldvinsdóttir og Diljá  Sigursveinsdóttir, víóluleikarinn Vigdís Másdóttir og sellóleikarinn  Gréta Rún Snorradóttir. Kvartettinn hefur komið fram við ýmis tækifæri  frá stofnun hans og nú síðast á tónleikum í Hljómahöllinni í Reykjanesbæ  þann 1. nóvember 2019. Spúttnik hefur verið í nánu samstarfi við  fiðlusmiðinn Jón Marinó Jónsson og leikið við hin ýmsu tækifæri á  hljóðfæri hans, sum í eigu hljóðfæraleikaranna sjálfra eða fengin að  láni.

Sjá nánar á: http://icelandstringquartet.com/

Útgáfutónleikar í Hannesarholti laugardaginn 6.júní kl.16.

Guðmundur Andri og félagar hans flytja efni af sólóplötu hans Ótrygg  er ögurstundin. Þetta eru frumsamin lög og textar – vísnatónlist,  lágvær, hlýleg og angurvær.

Harpa Másdóttir opnar einkasýningu sína í Hannesarholti föstudaginn 29.maí kl.16-18.

Hringformið er hið fullkomna form. Það skírskotar til hringrásar,  hringrásar lífsins og hringrásar í sífelldri verðandi. Hringurinn táknar  stöðuga hringrás skynjunar sem er endurtekning án þess að vera  endurtekning, því að ný sjónarhorn og túlkun eru alltaf í sjónmáli.  Hlutirnir eru endurhugsaðir með því að taka fleti sem hafa verið  skapaðir, rífa þá niður, afmá og byggja upp á ný. Allt getur gerst í  öruggu umhverfi hringformsins.

Sýningin er sölusýning og stendur til 21.júní 2020. Opið um helgar frá 11.30 til 17.

Í Hring - myndlistarsýning Hörpu Másdóttur

Syngjum Saman með Siggu Eyrúnu og Kalla Olgeirs

Syngjum saman í Hannesarholti með Erlen Isabellu Evudóttur. Aðeins 25  miðar í boði til að hægt sé að virða fjarlægðartakmörk. Endilega  hringið til að panta miða í síma 511-1904.

Hannesarholt hefur hlúð að söngarfi landsmanna síðustu sjö árin með  því að bjóða uppá samsöng undir stjórn kunnáttufólks, þar sem textar eru  á tjaldi og allir taka undir. Frítt fyrir börn í fylgd með fullorðnum  sem greiða 1000 króna aðgangseyri.

Bæði er hægt að bjóða fólki að taka þátt á staðnum, auk þess sem  streymt verður frá söngstundinni svo að fólk geti tekið þátt að heiman.  Að þessu sinni leiðir sönginn Erlen Isabella Evudóttir, fjórtán ára  ævintýrastelpa, sem hefur verið öflug í listalífi landsmanna undanfarin  misseri, bæði á sviði og í sjónvarpi.

Loksins getum við aftur boðið fólki að mæta í Hannesarholt til að  taka þátt í Syngjum saman. Aðeins 25 miðar í boði til að hægt sé að  virða 2m regluna. Endilega hringið til að panta miða í síma 511-1904.

Loks er hægt að bjóða fólki að taka þátt á staðnum, auk þess sem  streymt verður frá söngnum svo að fólk geti tekið þátt að heiman. Að  þessu sinni leiðir sönginn Svenni Þór, sem hefur starfað sem  tónlistarmaður í yfir 10 ár. Hann hefur unnið með sumum af þekktustu  tónlistarmönnum Íslands. Hann hefur gefið út tónlist sem hægt er að  njóta á youtube og eins hefur hann gefið út með hljómsveitinni „Nýju  fötin Keisarans“ og er nýjasta lagið þeira að koma út núna 15. maí.

Hólmfríður  Jóhannesdóttir mezzósópran og Julian Hewlett píanóleikari flytja tvo  þekktustu ljóðaflokka Schumann & Brahms á hádegistónleikum í  Hannesarholti sunnudaginn 10. maí kl 12.15.

Robert Schumann 1810 – 1856 Frauenliebe und Leben op. 42

Johannes Brahms 1833 -1897 Zigeunerlieder op. 103

Hólmfríður Var búsett í Vínarborg til margra ára og naut listisemda  lífsins í tónlist, góðum félagsskap listamanna, kaffihúsamenningu eins  og Melange sem er þekktasti kaffidrykkur Vínarbúa. Hólmfríður flakkaði  um Evrópu og dvaldi ein i Mílanó og Siena í eitt ár áður en hún flutti  heim til Íslands og hóf kennaranám. Síðar varð Hólmfríður menningarlegur  stjórnandi Listasafns Íslands og stuttu seinna opnaði hún sitt fyrsta  myndlistargallerí og söngskóla í Ingólfsstræti við mikinn fögnuð  listrænna unnenda. Síðar lá leiðin aftur í þýskumælandi landið til að  starfa sem óperusöngvari. Leiðin var löng og ströng og ekki mikið um  tilboð í minni hlutverk en það voru markmiðin til að byrja með.  Hólmfríður var svo heppin að vera ráðin til að syngja vínardúetta með  bassasöngvara og söng hún 2-4 tónleika í hverri viku. Þannig fékk hún  frábæra sviðsreynslu og átti salt í grautinn þó lífið hafi ekki alltaf  verið dans á rósum. Svoleiðis var það í einhverja mánuði eða þar til hún  sótti um stórt hlutverk og fékk. Þá var ekki aftur snúið. Ferðaðist um  Evrópu og söng af lífsins sálar kröftum. Ferðalögin tóku stundum á en  voru oftast skemmtileg og ævintýrum líkast. Í dag er Hólmfríður einn  þekktasti dáleiðari á íslandi og hefur rekið meðferðarfyrirtæki sitt í 9  ár undir nafninu Andlega Setrið. Hólmfríður hefur verið mjög virk í  tónlistinni og komið fram á 9 einsöngstónleikum síðustu tvö árin.

Julian Hewlett píanóleikari útskrifaðist frá The University of Kent á  Englandi. Julian er léttur í lund að eðlisfari og einstaklega þægilegt  að vinna með honum. Hann er með B.A gráðu í tónlist og bókmenntum og les  allt milli himins og jarðar og fær innblástur í orgelverk, einsöngslög  og píanótónlist. Fyrir stuttu gaf Julian út nokkrar bækur fyrir píanó og  komu þær út í öllum regnbogans litum. Hann hefur starfað á íslandi sem  píanóleikari, organisti, tónskáld og kórstjóri og er líklegast í hópi  virkustu tónlistarmanna á Íslandi.

Hádegistónleikar - vordagur með Schumann og Brahms

Hannesarholt  hlúir að söngarfinum með því að bjóða uppá fjöldasöng tvisvar í mánuði  að jafnaði yfir vetrartímann. Söngvaskáldið og leikarinn Bragi Árnason  stjórnar söngstundinni sunnudaginn 3.maí kl.14. Hann er þaulreyndur  skemmtikraftur sem hefur sett á svið tvo söngleiki hérlendis og í  Evrópu, gefið út eigin tónlist og leikið í fjölda kvikmynda og  sjónvarpsþátta á Íslandi og í Bretlandi þar sem hann nam og starfaði um  árabil.

Bragi leiða samsöng í sínum uppáhaldsdægurlögum sem lifað hafa með  kynslóðum okkar tíma, Hauk Morthens, Stuðmenn, Brimkló og Bubba, en auk  þess mun hann taka fyrir lög úr söngleikjum, þýdd yfir á íslensku og eru  löngu orðin húsgögn á hverju heimili þjóðarinnar.

Að venju birtast textar á tjaldi og allir taka undir. Frítt fyrir  börn í fylgd með fullorðnum sem greiða 1000 króna aðgangseyri.  Veitingahúsið í Hannesarholti er opið á sunnudögum frá 11.30-17.

Aríur  úr óperunni The Raven’s Kiss eftir Evan Fein og Þorvald Davíð  Kristjánsson verða fluttar í beinni útsendingu frá Hljóðbergi á  fésbókarsíðu Hannesarholti sunnudaginn 3. maí kl. 12:15. Óperan er  sungin á ensku.

Hlutverkaskipan: ● Gísli – ungur sjómaður: Ólafur Freyr Birkisson ●  Baldur – faðir hans: Egill Árni Pálsson ● Helena – aðkomukona: Hildur  Evlalía Unnarsdóttir ● Gunnar – lögregluþjónn: Bergþór Pálsson ● Anna –  dóttir hans: Berta Dröfn Ómarsdóttir ● Píanó: Sigurður Helgi Oddsson

The Raven’s kiss er ópera í tveimur þáttum eftir Evan Fein og Þorvald  Davíð Kristjánsson. Evan samdi tónlistina en Þorvaldur skrifaði  söguþráðinn og textann. Óperan er skrifuð fyrir 5 einsöngvara og litla  hljómsveit, en á tónleikunum sér Siguður Helgi Oddsson píanóleikari um  meðleikinn. Sagan gerist í litlu sjávarþorpi og er byggð á íslenskri  þjóðsögu. Dularfull kona, framandi og fögur, kemur óvænt í þorpið. Við  það breytist líf, hegðun og hugsun heimamanna.

Óperan var frumflutt 23. ágúst 2019 í Herðubreið á Seyðisfirði, við  frábærar undirtektir heimamanna. Það varð uppselt og líka á  aukasýninguna 24. ágúst.

Hannesarholt  hefur hlúð að sönghefð landsmanna síðastliðin sjö ár. Í samkomubanni er  beint streymi frá söngstund í Hljóðbergi Hannesarholts alla sunnudaga  kl.14 og textar birtast á tjaldi. Elín Halldórsdóttir söngkona, tónskáld  og rithöfundur stjórnar söngstundinni sunnudaginn 26.apríl kl.14.

Elín nam söng og píanóleik í Nýja Tónlistarskólanum hjá þeim Signýju,  Sæmundsdóttur, Alinu Dubik, Svönu Víkingsdóttur og Rögnvaldi  Sigurjónssyni. Hún var í 3 ár í London við London College of Music,  þaðan sem leiðin lá til Kölnar í Þýskalandi þar sem hún nam hjá Lia  Montoya-Palmen og Philip Doghan. Síðar lærði hún í Regensburg og stýrði  þar kórunum Femmes Fatales og Spirit of Joy auk þess að koma oft fram  opinberlega. Elín bjó nokkur ár í Keflavík eftir að hún flutti heim, þar  sem hún kenndi við Tónlistarskóla Reykjanesbæjar auk þess að stofna  Gospelkór Suðurnesja, sem breyttist síðar í Sönghóp Suðurnesja. Síðustu  ár hefur hún starfað mikið við tónmenntakennslu og kórastarf í  grunnskólum auk þess að gefa út efni sem má finna á SoundCloud síðu  hennar, Spotify og í fyrra gaf Menntamálastofnun út söngleikinn  “Ævintýri Sædísar skjaldböku” með 8 nýjum lögum, sem má finna á vef  stofnunarinnar. Hún leggur mikla áherslu á sönglög fyrir börn og eftir  hana liggja tugir sönglaga, bæði útgefin og óútgefin.

Syngjum Saman með Elínu Halldórsdóttur

Gunnar  Kvaran sellóleikari mun leika þrjá kafla úr sellósvítum Bachs í beinni  veitu frá Hannesarholti, laugardaginn 25. apríl kl. 15.00. Hann mun lesa  hugleiðingar sínar um kaflana inn á milli flutningsins.

Gunnar Kvaran í beinni frá Hannesarholti

Söngkonan Ondina er lagahöfundur og listamaður frá Brooklyn, New York  en býr nú og starfar í Reykjavík. Hún býður uppá lifandi streymi frá  Hannesarholti fimmtudaginn 23.apríl kl.20. Tónlist hennar er lifandi  blanda af indí-fólk tónlist, rokki, blús og syntha-poppi með einlægu en  þó kröftugu yfirbragði. Ondina er þekkt fyrir mikla breidd í tónlist  sinni og kemur bakgrunnur hennar sem dansari og leikari sterkur inn í  lifandi flutningi hennar. Hægt er að nálgast tónlist hennar á Spotify,  Apple Music og öðrum streymisveitum. Ondina mun spila semi-acoustic sett  af eigin tónlist sem og ábreiðum í þessu lifandi streymi í  Hannesarholti.

Odina is a singer songwriter from Brooklyn, New York, who now lives  and works in Reykjavik, Iceland. She will perform live from Hannesarholt  on Thursday April 23rd at 8 pm GMT. Her music is a mixture of  indie-folk music, rock, blues and syntha pop, with a sincere but  powerful feel. She is known for a broad spectrum in her music and her  background as a dancer and actress is apparent in her live performance.  You can find her music on Spotify, Apple Music and other stream sources.  Odina will play a semi-acoustic set of her own music as well as cover  songs in this live stream on facebook from Hannesarholt.

https://www.facebook.com/ondinathequeen/
 https://open.spotify.com/artist/2pbEiUOfroRNDFIyxtk1HS?

Hannesarholt hefur hlúð að söngarfi þjóðarinnar síðastlðin sjö ár með  því að bjóða uppá fjöldasöng undir stjórn kunnáttufólks. Í samkomubanni  nýtum við tæknina og steymum Syngjum saman í beinni alla sunnudaga kl.14  á fésbókarsíðu Hannesarholts. Ragnheiður Gröndal leiðir söngstundina  frá Hannesarholti sunnudaginn 19.apríl og textar birtast á tjaldi svo að  allir geti tekið undir í stofunni heima. Ekki þarf að kynna Ragnheiði  Gröndal, en hún hefur verið meðal ástsælustu söngvara þjóðarinnar frá  unga aldri. Stillið inná fésbókarsíðu Hannesarholts og njótið þess að  syngja með.

Birtingarmyndir - Stefán Boulter

Farvegur - Ólöf Svava Guðmundsdóttir

Brek í Hannesarholti

Raddir vorsins vakna

Guðmundur Andri og félagar - Ótrygg er ögurstundin

Hátíðartónar

Reynir Del Norte - Flamenco hringinn í kringum landið

Spútnikk strengjakvartett

Guðmundur Andri - Útgáfutónleikar

Í Hring - myndlistarsýning Hörpu Másdóttur

Syngjum Saman með Siggu Eyrúnu og Kalla Olgeirs

Syngjum Saman med Erlen Isabellu

Syngjum Saman með Svenna Þór

Hádegistónleikar - vordagur með Schumann og Brahms

Syngjum Saman með Braga Árnasyni

Aríur úr óperunni

Syngjum Saman með Elínu Halldórsdóttur

Gunnar Kvaran í beinni frá Hannesarholti

Odina í beinni

Syngjum Saman með Ragnheiði Gröndal